الثلاثاء، ١٥ يوليو ٢٠٠٨

الحمد لله الذي لا يحمد على مكروه سواه

الواحد ميعرفش الخير فين بس بردوا ميعرفش كل مصحح ضميره كان فين

قبل ما اقول انى جبت 87% بعد ما كنت متوقعه لنفسي 93% ودرجاتى كلها ف مستوي توقعاتى ما عدا التفاضل والتاريخ
لازم اعترف انى كنت مستهتره جدا ف دراستي وحتي الاوقات اللى كنت بذاكر فيها مكانوش ف البيت بيوفرولى الجو المناسب
اصلهم كانوا مش فارقه معاهم اصل انا ادبي
الموضوع اولا واخيرا نصيب بس انا بجد كانت نفسيتي تعبانه ايام الامتحانات انا عارفه انى بمجهود مش هقول مجهود اكتر لانى مفتكرش انى بذلت مجهود كنت اقدر اعدي ९०%
احتمال يكون دا عقاب الاهى والسنه الجايه مش هستمر على الحال دا
بنت عمتي ادي بس كانت علمى علوم وجابت ماشاء 98% حقيقي انا سعيده ليها وخجلت من نفسي اكتر بعد ما عرفت مجموعها بس لا مجال للمقارنه بين مذاكرتي ومذاكرتها والجو اللى كانوا موفرينه ليها ف البيت والجو عندي غير ان مامتها كانت بتذاكر معاها

صديقاتي المقربات بردوا معرفش ايه اللى حصلهم مجموعهم مفرق عن مجموعي كتير واللى زعلانه عشانها اكتر اللى كانت كيميا جابت 85% بس انا وهى عارفين ان دا حصل لانها غشت وغششت ف الامتحان وهى مقتنعه ان ربنا موفقهاش بسبب دا
يعني الرياضه اللى الكل اشتكي منها جابت فيها 48و الكيميا اللى قالوا انها كانت اسهل من التاريخ جابت فيها 31و باقي داراجتها كويسه جدا
الواحد مش عارف هو رايح على فين
بس حياتنا سيناريو مكتوب احنا بنمثله وانا عندى قناعه ان الخيره فيما اختاره الله
كان نفسي اسعد الناس اللى بيحبونى ونجاحى يفرق معاهم بس انا كنت مستهتره ولازم افوق لنفسي
متعرفوش كلمة مبروك دي بستحملها ازاى
مبروك على ايه قرايبي منهم اللى دخل علوم واللى دخل صيدله وهندسه واختى داخلت اداب باختيارها من علمى علوم بمجموع كبير مفيش غير ابن عمي دخل حقوق بعد ما حول ادبي ف تالته وهو معرف ان مستواه مش عالى اوى
لكن انا...
الطبيعي ان الناس بتنزل ف تالته عن تانيه بس دا ميمنعش ان فى ناس بتزيد ف تالته
اللى هزعل عشانه اكتر من زعلى على مجموعي هو ابن عمي كان علمى رياضه جاب السنه اللى فاتت 94و السنه دي ९२
بكلمه وبقوله فى معاهد خاصه بتدي بكالريوس هندسه زي الكليات عادى قالى وليه مدخلش هندسه قلتله وانت عندك امل قالى وليه لاء خليكي متفائله وهسمع كلامه

كان نفسي اروح ف اى حته عشان مستحملش سخافات البشر اللى بتتلخص ف كلمة مبروك مجموعك حلو بالنسبه لادبي
امى عايزه تدخلنى تربيه واختى عايزانى ادخل اداب وحلم اعلام اتفشفش
امى بتتريق عليا بتقولى جبت مجموع وحش عشان مكونتش ناويه على خير هى كلية اعلام عيبه ولا ايه
الحمد لله

هناك ٢٢ تعليقًا:

Moustafa` يقول...

السلام عليكم الاول
ثواني بقه هنا .. هو فين المكروه ده
عارفه
انتي لو كنتي جبتي مجموع ف السما
كنتي هتتغري
ايوه عقليتك جامده وبتلمي بسرعه
بس ربنا عادل ومش من العدل
انك تتساوي باللي ما نمش
---
دي قرصه ودن . اه مؤلمه
بس كانت لازم
انتي إمكانياتك حلوه اوي
اعرف ناس كتيييير كانت ف الضياع الأليم ف تانيه
وجت تالته والله العظيم ضربت 101 %
يعني نقصت درجه ونص ومعاا مستوي متقفل
---
الدرجات ف تالته حلوه اوي
خصوصا ان عندك علم نفس
وجيولوجيا
ودول مضمونين ال 50
مع دماغ زي بتاعتك
والعربي والانجليزي هبولي
هيبقي فاضل الإقتصاد والإحصا دول كنا بنطلع مع شباب ال60
وبيزعلوا علشان غلطوا ف نص
الغمتحان بيبقي ف جينا قبل ما بندخل
--
حقيقي انا جبت ف ثانوي 99 ونص
بس مش بالصعوبه المتخيله
--
في ناس ربنا مديلها إمكانيات
ليه ما نذاكرش ولو ساعه ونص ف اليوم
بس م الاول وما نراكمش دروس
--
اقولك
انتي اطلعي صيفي وغيري جو مع أي حد م العيله وارجعي شهر 8
نشيطه وابدأي ف الطحن
العبي اه .. ادخلي نت واكتبي بردو اه
إنما مش تهملي مذاكرتك
---
بجد انتي لو بمذاكره ومتابعه قليلين جدا
كنتي ضربتي 95
بس الحمد لله على كل حال
---
مبرووووووك أيوه ومليون مبروك كمان
اصحابك فرحانين ليكي اوي
وفخورين أوي أوي بالمجموع ده
لأنه نقطه انطلاق
---
عندي ثقه كبيره اوي ف ربنا ثم ف قدراتك
هتجيبي السنه الجايه بإذن الله 97
يعني قدامك 6 درجات تبرطعي فيهم براحتك
والمتوسط يبقي 92
ونخبط مستوي كمان واحد
يبقي 93 %
---
وطبقا لنظريه ابن عمك التفائليه
الإعلام هيقل نص ف الميه
وتبقي العمليه ملبن
---
مافيش مستحيل
بجد مجموعك حلو والله
علشان بمذاكره عبيطه وجبتي كده
يبقي حبه مجهود هنفنجر الثانوي كلها
--
عيشي فرحتك ومش تنكدي على نفسك
الحمد لله رب العالمين
خير كتير
---
وبعدين - بس بعد ما تبذلي مجهود وترضي عن نفسك- فيه أداب قيم إعلام
--
ومن غير ده ولا ده
ياما كتاب كبير ومذيعين وممثلين كمان
التاريخ خلد أساميهم
وكانو ف كليات تانيه
ممكن تحترفي إداره الاعمال - شغلها موز اليويمن دول-
وكــ هوايه
أنا شايفك موهوبه جدا وكفأ ليها
هتكتبي وتفقعي مقالات
وتبقي مذيعه زي النص سطر اللى فوق المدونه على ايدك الشمال ده
----
افرحي
انا كنت متخيل هلاقي صوره بلالين وتورته
وقلقت لما البوست اتأخر
احمد يارب
اطمنا عليكي
----
وبعدين انتي ف السنه دي كسبتي كتير بردو
دماغك كبرت وقريتي كتير
وطريقه كتابتك اطورت
--
غيرك مع احترامي ليهم والف مبروك ليهم بردو .. بس ما طوروش مهارات تانيه
ربنا يوفق الكل
---
ما تزعليش من نفسك
حولي طاقه الغضب دي لإيجابيه نجاح وطموح عالي وأم ف بكره
---
ارسمي ابتسامه 2 شبر على وشك
الله يبارك ف حضرتك يا عمووو
ايدك بقه علي هديه النجااح
---
ربنا يكون معاكي للأبد
اجدعني عن كده شويه
وبلاش البؤس الي مالي البوست ده
ومستني طاقه شعريه هتتفجر ف المدونه
أكيد ما الضغط بينتج إبداع
ربنا يوفقك لكل خير
---
معلهشي ما قدرتش أتقمص شخصيتك المره دي
محتاج أرغي
سلاااااام يا أجدع مذيعه وكاتبه صحفيه
---
مصطفي

NilE_QueeN يقول...

التعليق صفحه يا مصطفى

هرد على ايه ولا ايه

ربنا يكرمك بجد

كلامك رفع معنوياتي وحسسني بشوية امل

وكلامك على كلام الناس الحلويين اللى حواليا حاسه الى حد ما ان مبقاش فى مشكله

وانت معاك حق

مش هبقي بلعب واجيب مجموع كبير وكنت فعلا هتغر

حالا وانا بكتب الكومينت جه تليفون لبابا وانا اللى رديت وطبعا السؤال التقليدي عملتى ايه والاجابه التقليديه مبروك وعمو دا اضاف لاء بجد !!
يا للعار
زهقت مش بحب المجاملات الجوفاء

بص بقي مفيش ضغط يبقي مفيش انفجار فى حاجات تانيه ممكن تنفجر الماده الحفازه حلوه

اختى لسا شايفه ناتيجتها دلوقتى وجابت جيد مرتفع داخله اداب ب 93ونص

كنت بتريق عليها عشان دخلت اداب واقعد اقولها اخرتك ايه دخلتى اداب

انا مش حابه بس ان مستوايا العقلي والعلمى يتحدد بالمجموع دا

dina يقول...

شطورة انك عارفة ان دا اللى فيه الخير...عاوزة اقولك ان مش شرط الناس بتقل انا عندى واحدة صاحبتى ادبى و علت من 75 الى 91 السنة دى ما شاء الله...و انا مبسوطة اكتر انك بتحطى ايدك على اسباب المشكلة عشان تقدرى تعالجيها..و يمكن يكون ربنا عمل كدا عشان السنة الجاية تاخديها جدا اكتر بصرف النظر حتى عن اى حاجة او عن جو البيت و ان شاء الله ربنا حيكرمك...خلى املك كبير و اعملى اللى عليكى و سيبى الباقى على ربنا من غير تفكير بجد و حتزيدى و حتدخلى الكلية اللى نفسك فيها ان شاء الله و ابقى قولى دينا قال

موناليزا يقول...

ياحبيبتى الحمدلله المهم انك نجحتى وذى ماقلتى ان الظروف حواليكى ماكنتش مساعداكى وانتى ماديتيش للموضوع حقه يبقى خلاص خلينا فى الواقع وماتزعليش نفسك واستفيدى من الدرس ده كويس عشان بعد كده ان شاء الله تجيبى اعلى الدرجات واعرفى انها حاجة مش صعبة يكفى انك عايزاها
انا كمان استهبلت فى سنة تانية وكان مجموعى خيبة بجد بس اتحديت الجميع بما فيهم نفسى وجبت مجموع محترم خلانى بقيت مرحلة اولى كمان
ارضى بما قسمه الله وتاكدى ان ربنا مابيعملش حاجة وحشة مهما بان لينا وتعرفى ده بعدين
افرحى ياحبيبتى لنجاحك ماتخليش حاجة فى الدنيا تلغى فرحتك
انا لغاية دلؤتى كان اسعد لحظة فى عمرى يوم نجاحى فى الثانوية العامة قبل حتى ما اعرف المجموع
الف مبروك
وبالمناسبة دى احب اسمع وحياة قلبى وافراحه واهديها لحبايبى واخواتى اللى ربنا كرمهم ونجحوا فى الثانوية العامة
عايزين بقى بالونات تعلقيها كده فى المدونة وتضيفى جو من البهجة
ومبروك ياجميلة

Ruwida Ashour يقول...

الف الف مبروك وعقبال التخرج والعريس طبعا... مش المهم المحموع بس المهم انك جبتيه بمجهودك و بلا مساعده من حد"غش "
و ربنا يوفقك بس حتدخلي ايه

عروس البحر يقول...

الف مبروك انتي مجموعك ما شاء الله حلو بالنسبة اللي سمعناعن الامتحانات
و الناجح يرفع ايده
مبروك
تحياتي

NilE_QueeN يقول...

اسفه على الغياب بسبب طروف صحيه و وقتيه وانترنتيه

dina

انتى قولتى على مجموع صحبتك اللى اظنك كتبتيه غلط بس مش مشكله

بس مطمنتنيش انتى جبتى كام

______
موناليزا

على فكره خطر جدا ان اللى حواليا يحسسونى انهم فخورين بيا
هحس انى مش فاشله زهفضل زي مانا

وعن اسعد لحظه فى لحظه تهمنى اكتر من نجاحى ف الثانويه العامه لانى مش مستنظره الحكومه بتاعتنا تعرفني مستوايا العقلي
_________
weda
انتى قولتى المفيد اهم حاجه العريس

انا لسالى كمان سنه على الكليه وان شاء الله قدامى اما تربيه او لغات وترجمه ومجموعى ان شاء الله يدخلنى اى واحده منهم من السنه دى
والاتنين بياخدوا مجموع عالى
____________

عروس البحر
انا مجموعى مش وحش بس انا عارفه انى مقلش عن اللى جابوا 95 و 97 انا حتى طول عمري شايفه انى ف مستواهم بفهمي وعقلي وهما ف مستواهم دا بحفظهم الاعمى

والحمد لله

محمد فاروق الشاذلى يقول...

ألف مليون مبروك النجاح
أما بخصوص حكاية الدرجات دى فصدقينى فى النهاية اللى هايتخرج من طب أو حقوق زى اللى هايتخرج من معاهد كله هايقعد فى البيت مش لاقى شغل وبالتالى علشان يشتغل هايضطر يشتغل أى حاجة بعيدة عن دراسته وحتى اللى هايشتغل فى تخصصه هايكتشف إن فى الآخر اللى درسه حاجة واللى فى الحياة العملية حاجة تانية خاااااااااااااالص

مدحت محمد يقول...

معلش قدر الله وماشاء فعل


فعلا فى ناس كتير اتظلمت

NilE_QueeN يقول...

قلب مصري

انا بتطلع لدراسه احبها تاهلنى للعمل ف مجال احبه ولو مشتغلتش يكفيني استمتاعى بدراستي

_____________

محمد مدحت


اه والله مظلومه

شفـقــة و إحســــان يقول...

سامعة حد بيتكلم على اعلام
انا جيت اهو على السيرة لعلمك انتى عندك حق اعلام مفيش احلى ولا اجمل منها واسالينى انا
ان شاء الله ربنا يحققلك كل اللى فى بالك
مبروك وكل سنة وانتى طيبة
وقولى لماما ان دراسة اعلام مش وحشة اما الشغل فبيرجع لاختيارك الشخص نفسه

Ahmed Al-Sabbagh يقول...

:)

كل سنة وانتى والأسرة الكريمة طيبين وبخير

ورمضان كريم

بعودة الايام

اللهم بلغنا رمضان وانت راضٍ عنا

تقديرى ومحبتى

أحمد

NilE_QueeN يقول...

شفقه واحسان

انا حاسه ان حماسي تجاه اعلام اصابه فتور بعد ما مجموعى شككني ف مقدرتى انى اوصلها
بفكر ان شاء الله ادخل كليه ادرس فيها لغه
وكل سنه وانتوا طيبين
_________

شكرا لتشريفك ليا يا احمد

وكل عام وانت بافضل حال

Unknown يقول...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

Unknown يقول...

اية رأيك تشرفنا بالتواجد معنا يوم السبت؟ 13/9 هنتقابل فى مستشفى ابو الريش الساعه 3 عصرا للتبرع للاطفال
؟؟؟
وباقى التفاصيل عندى بالمدونة

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

غير معرف يقول...

السلام عليكم أنا إيمان فى 3 ثانوى
جبت فى تانية 65 فى أمل أنى أزيد
لو سمحتى جوبينى

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
Moustafa` يقول...

يا ترى انتي فين ؟؟
ياريتك تطمنينا عملتي ايه .

أنا قريت البوست بكل تعليقاته
وكان نفسي في خبر صغنطوط يقولي إنك الحمد لله حققتي حلمك وبقيتي في المكان اللي تستحقيه .

ربنا يكتبلك كل خير . ويرضيكي بيه

Moustafa` يقول...

من سنة فاتت بالضبط !!

ارجعي . واطردي الخفافيش اللي عششت في المطرح

Unknown يقول...

thx

مؤسسه تنظيف