الجمعة، 14 ديسمبر، 2007

عم عبدو

مساء امس الخميس13-12-2007

و فى اخر الحصه الخامسه جات انطوانيت اللى هي مديرة المدرسه و مسكت الميكروفون وطلبت من كل افراد المدرسه يتجمعوا ف ارض الطابور

انا شياطين الدنيا لعبوا ف دماغى خصوصا انى كنت مزوغه من الحصه
قلت يمكن المزوغين كتير وحد اشتكالها من المدرسين وهتجيبنا تلغبطنا

بس ولله الحمد الموضوع طلع بعيد عن توقعاتى خااااااالص
لما افراد المدرسه اتجمعوا كلهم مسكت المايكروفون تانى و كانت مبتسمه ف اطمنت
وقالتنا انها جمعتنا دلوقتى عشان تكرم انسان مميز جدا
ساعتها الكل اتخنق بقي توقفنا تحرقنا ف الشمس عشان تكرم بني ادم يعين تمرمط بتاع 500 بني ادم اكراما لبني ادم واحد
قالتلنا مش هقولكم مين الشخص دا انا هتكلم عنه وانتوا تقولوا مين هعملكوا فزوره يعني
قلنا ميضرش اهي انطوانيت وغصب عننا هنتحملها
وكان كلامها كالاتى_هو شخص بيعمل ف المدرسه من بداية افتتاحها عام 1974 وطول فترة عمله ماخدش اجازه ولا غاب ولا عمل اي مشاكل ولا رفض ينفذ طلب يتطلب منه ولا اتعرض لاي عقاب من اى نوع

مفكرناش كتير توصلنا كلنا لانه عم عبدو(عبد الغني)؟
وكان فعلنا الشخص اللى جمعتنا عشان نكرمه عم عبدو

انا مؤمنه ان كل انسان فى ف حياته عم عبدو دا شئ لا جدال فيه وان حصل,ومكانش فيه فهي مجرد شواذ لا داعى لذكرهم
انا وعلى الرغم من تعبي الشديد وانى كنت بفكر اموت اول ما شوفت عم عبدو بملامحه المصريه الجميله وابتسامة الرضا اللى على وشه حسيت انى اتحسنت جدا
كان نفسي اقدر اصوره وهو واقف قدام العلم يحينا ولا الريس

قلت لنفسي ساعتها ان مدرسين كتير بيروحوا ويجوا ومحدش بياخد باله وممكن نسئل عنهم ومنلاقيش حدود كتير تعرف اخبارهم مع انهم اساتذه كبار اغلبهم طلعوا بعثات كملوا فيها دراستهم ف بلاد برا ومعاهم شهادات كبيره

تيجي انطوانت تكرم عامل النظافه؟؟حاجه كانت غريبه اوى عليا بس كانت مبهجه
اللى حصل بقي ان عم عبدو طلع على المعاش23_10
لكن لتمسك ادارة المدرسه بيه استصدروا قرار بانه يفضل ف المدرسه وكمان جابتله هديه

دا بيوافق نظريتي ان الناس لازم يكون مميز ايا كان مجال عمله دا عامل نظافه وفى ف المدرسه عمال كتير غيره
مفتكرش مره ان فى واحده ف المدرسه دعت على عم عبدو ولا واحده اتخنقت منه ولا شافته معدي غيرت طريقها عشان متشوفهوش بعكس مدرسين كتير بيحصل معاهم كده
وربنا يخلينا عم عبدو

هناك 22 تعليقًا:

أنا حر يقول...

لكل مكان رمز على قد بساطته على قد ما بيعني لينا حاجات كتير قوي
يابخت عم عبدو اللي أثر فينا أكتر من مدرسينا
تحياتي

Abdou Basha يقول...

على فكرة مدونتك حلوة، واللي قريته جميل، لدرجة اني حاسس انك أكبر من 16سنة
:)

s@gi l'ombre يقول...

خليكى أدبى واستمرى...
طالما مؤمنه بحاجه ..هتحققى اللى انتى عايزاه
وبصراحه مش عايزك تقطعى عليا فى موضوع الطب النفسى ده
نظرتك الفلسفيه رائعه
عم عبدو .. رمز موجود كتير ف حياتنا
بس هل انطوانيت كتير ف حياتنا ما ظنيش
لو بقيت طيب ..هتنداس
حكمه استخلصتها من الزمن
اكيد هى غلط
بس ده واقع
طريقتك حلوه والمدونه دى ليها مستقبل
انا ضفتها لل ( المفضله) تحياتى كتير

gannah يقول...

بصراحة كلامك حاسسنى انك كبيرة ....وشكلك كده هتبقى كاتبة مشهورة

NilE_QueeN يقول...

انا شاكره جدا دعمكم ليا

ويارب تفضل المدونه منوره بتعليقاتكم

Ahmed Al-Sabbagh يقول...

:)

كلامك حلو اوى واسلوبك فى الكتابة اكثر من رائع

على فكرة المدونة كلها حلوة

تحياتى لكى

Aydy يقول...

ياريت تزوري مدونتي..لأنها مذكراتي ..بس الفرق في العمر كتير..أنا بتنبألكي بمستقبل جميل باذن الله
د عائدة

الحشرى يقول...

هو الواحد فعلاً لو مش مميز فى شغله يبقى هو وأى إنسان عادى تانى

وملوش أى قيمة لكن كل واحد يجب أنه يكون ليه حاجه مختص بيها علشان يقدر يعطى ويحاول يطور فى نفسه أول بأول

NilE_QueeN يقول...

احمد الصباغ

اشكرك على ذوقك العالى

د.عائده

تعليقك اسعدني جدا

الحشري

بحس وانا بقول يا حشري انها اهانه بس تشريفك لمدونتى وتعليقك فيها اسعدني

سبهللة عالآخر يقول...

دمك شربات وان شاء الله هاتبئى مذيعة عسل
وخدى بالك ان اثنوية العامة بتاعت اليومين دول مفتحة خالص وبتجيب لحد 102%
اما الثانوية العامة بتاعتنا احنا كانت عامية وعورة
كان اللى يجيب 85% يدخل هندسة وهو حاطط رجل على رجل ويتعملوا فرح
ولا فرح المطاهر يوم طلوعه عالمعاش

NilE_QueeN يقول...

سبهلله عالاخر

كلامك صح بس انا متاكده ان الثانويه دي فيها عيب يمكن معاقه ذهنيا والمجاميع ارتفعت مواكبة لارتفاع الاسعار

نهر الحب يقول...

الانسان يعيش مرة واحدة وعليه ان يقرر مصيرة اي كان هو
حتى يرضا بما يعيشة

اسلوبك حلو ومميز بالتوفيق

dina يقول...

معاكى حق....كل انسان فى فى حياته عم عبدو..انا اول ما قريت عنوان الموضوع افتكرته عم عبده تانى بتاع مدرستى انا..و قلت يا محاسن الحلو...معقول يكون هو.....انما فعلا الناس الطيبيين دول اللى بيحبوا شغلهم و بيعملوه بقلب و بذمة هما اللى دايما بيفضلوا فى ذاكرتنا مع ان ممكن يكون فى ناس اعلى منهم كتير انما ولا بنفتكرهم بمجرد ان السنة تخلص
شدى حيلك بقى يا قمر
الامتحانات قربت

NilE_QueeN يقول...

نهر الحب

اسعدني تعليقك حقا


دينا

حيلي اديني بشد فيه كان اتقطع قبل كده وجبت واحد ياباني مطاط

cenotaph يقول...

عم عبده هيبأه موجوده معاكي حتى في الجامعة سدأيني

نهر الحب يقول...

بصراحة انا شايفة ان دا اقل واجب
للانسان اللى بيوطى عشان يرفعنا

يعنى دا واحد شال ما القيناه
نظف ما وسخناه

بوست حلو كوين بالتوفيق

NilE_QueeN يقول...

cenotaph

انا اتمني الشعب كله يبقي عم عبدو

نهر الحب

هو دا نوع الشخصيات التى على تواضعها تستحق التقدير

el_assel يقول...

انا مؤمن تماما ان اي واحد مهما كانت شغتلته له رسالة لازم يؤديها
وان حياته مش كده علي الفاضي

اعتقد ان عم عبدو قد ادي رسالته وتقدم علي كثير من المدرسين اللي انتي بتقولي انهم كملوا تعليمهم بره


شدي حيلك في الامتحانات



سلاماتي

enjy يقول...

الانسان لازم يكون مميز ايا كان مجال عمله.. انت لخصتى فلسفتى بسهولة الله ينور تحياتى لعم محمد وربنا يوفقك يا رب

bar2ash يقول...

هاي عروسة النيل
مدونتك جميله وبتناقش مواضيع جميله بجد

انا قريت اخر بوست وناوي اخد لينكها
وهقرأها كلها

تحياتي ليكي

استمري

NilE_QueeN يقول...

el_assel

انا كمان مؤمنه ان لكل انسان رساله لازم ياديها على اكمل وجه

enjy

بكون سعيده لما الاقى حد بيفكر زيي وعلى فكره اسمه عم عبدو

bar2ash

يسعدني جدا ان المدونه نالت اعجابك

______________________

اعتذر عن تاخرى على الرد بسبب الحصار المفروض عليا على امل انى اذاكر وان شاء الله همتحن التاريخ يوم السبت وتنتهي المهزله

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘