الاثنين، ٣ أغسطس ٢٠٠٩

انا..فتاة جامعية%



لقد امنت فى هذا العام_فقط_بقيمة العمل الجاد وادركت انه اكثر اثمارا من العشوائية والاهمال.
لقد اخترت دخول الفرع الادبي ف الثانوية العامة فى لحظه اصفها بانهاء حمقاء على الرغم من اقتناعى الان بصواب ما فعلت ولكن فى حينها كان هذا الاختيار تصرف احمق مبني على افكار حمقاء لا معقوله.
لقد كانت النسبة التى حققتها فى الصف الثاني الثانوي 87% وهي نسبة مخجلة بالمقارنه بما عرفت به من ذكاء وسعة عقل و لكن اتذكر ما قاله لى والداى واختى بان هذه النسبة كبيرة اذا ما قورنت بما بذلت من جهد،لقد كانوا يتوقعون لى الاسوء...
ولكن فى هذا العام الذي يوشك على الرحيل تغير شيء ما بداخلى ، ليس شيء واحد بل اشياء واصبحت اذاكر كما لم افعل طوال حياتي ،وفى مقابل الجهد الذي بذلته جاء الفارق ملموسا ليشجعني على بذل المزيد فلقد جاءت نسبتي 96.3%فى الصف الثالث والفارق كبير وجعلنى اردد من حينها(لو كنت ذاكرت السنه اللى فاتت كانت فرقت كتير)
ف النهايه لم اصل بمجموع السنتين المتواضع 91.5% لابعد من كلية التربية جامعة المنصوره وهى اقصي امال والدى و والدتي لي فهى افضل كلية ادبية متاحة فى جامعة المنصوره حيث انتمي


لامضي اربع سنوات داخل هذه الكلية ادرس اللغة الانجليزية بشكل اساسي الى جانب عدد من المواد التربوية واللغة العربية والفرنسية.

الثلاثاء، ١٥ يوليو ٢٠٠٨

الحمد لله الذي لا يحمد على مكروه سواه

الواحد ميعرفش الخير فين بس بردوا ميعرفش كل مصحح ضميره كان فين

قبل ما اقول انى جبت 87% بعد ما كنت متوقعه لنفسي 93% ودرجاتى كلها ف مستوي توقعاتى ما عدا التفاضل والتاريخ
لازم اعترف انى كنت مستهتره جدا ف دراستي وحتي الاوقات اللى كنت بذاكر فيها مكانوش ف البيت بيوفرولى الجو المناسب
اصلهم كانوا مش فارقه معاهم اصل انا ادبي
الموضوع اولا واخيرا نصيب بس انا بجد كانت نفسيتي تعبانه ايام الامتحانات انا عارفه انى بمجهود مش هقول مجهود اكتر لانى مفتكرش انى بذلت مجهود كنت اقدر اعدي ९०%
احتمال يكون دا عقاب الاهى والسنه الجايه مش هستمر على الحال دا
بنت عمتي ادي بس كانت علمى علوم وجابت ماشاء 98% حقيقي انا سعيده ليها وخجلت من نفسي اكتر بعد ما عرفت مجموعها بس لا مجال للمقارنه بين مذاكرتي ومذاكرتها والجو اللى كانوا موفرينه ليها ف البيت والجو عندي غير ان مامتها كانت بتذاكر معاها

صديقاتي المقربات بردوا معرفش ايه اللى حصلهم مجموعهم مفرق عن مجموعي كتير واللى زعلانه عشانها اكتر اللى كانت كيميا جابت 85% بس انا وهى عارفين ان دا حصل لانها غشت وغششت ف الامتحان وهى مقتنعه ان ربنا موفقهاش بسبب دا
يعني الرياضه اللى الكل اشتكي منها جابت فيها 48و الكيميا اللى قالوا انها كانت اسهل من التاريخ جابت فيها 31و باقي داراجتها كويسه جدا
الواحد مش عارف هو رايح على فين
بس حياتنا سيناريو مكتوب احنا بنمثله وانا عندى قناعه ان الخيره فيما اختاره الله
كان نفسي اسعد الناس اللى بيحبونى ونجاحى يفرق معاهم بس انا كنت مستهتره ولازم افوق لنفسي
متعرفوش كلمة مبروك دي بستحملها ازاى
مبروك على ايه قرايبي منهم اللى دخل علوم واللى دخل صيدله وهندسه واختى داخلت اداب باختيارها من علمى علوم بمجموع كبير مفيش غير ابن عمي دخل حقوق بعد ما حول ادبي ف تالته وهو معرف ان مستواه مش عالى اوى
لكن انا...
الطبيعي ان الناس بتنزل ف تالته عن تانيه بس دا ميمنعش ان فى ناس بتزيد ف تالته
اللى هزعل عشانه اكتر من زعلى على مجموعي هو ابن عمي كان علمى رياضه جاب السنه اللى فاتت 94و السنه دي ९२
بكلمه وبقوله فى معاهد خاصه بتدي بكالريوس هندسه زي الكليات عادى قالى وليه مدخلش هندسه قلتله وانت عندك امل قالى وليه لاء خليكي متفائله وهسمع كلامه

كان نفسي اروح ف اى حته عشان مستحملش سخافات البشر اللى بتتلخص ف كلمة مبروك مجموعك حلو بالنسبه لادبي
امى عايزه تدخلنى تربيه واختى عايزانى ادخل اداب وحلم اعلام اتفشفش
امى بتتريق عليا بتقولى جبت مجموع وحش عشان مكونتش ناويه على خير هى كلية اعلام عيبه ولا ايه
الحمد لله

الأحد، ٢٩ يونيو ٢٠٠٨

هيه هيه اخدت اجازه هيه


الاجازه شيء ممتع؟؟اكيد الكل شايف ان كلامى صح
واكيد الكل دا بيتضمن الناس اللى بتخرج وبتهيص وتتبسط ف الاجازه من اولها لاخرها
وف الغالب الشباب هما اللى بيعملوا كده اما البنات فا اذا خرجوا مع صحابهم بتبقي مرات معدوده ف اوقات محسوبه وبيقعدوا يستنوا فرج ربنا بابا ياخدهم يخرجهم ينزلوا مع مامتهم او اختهم الكبيره يعملوا شوبينج ومظنش ان دا لطيف ابدا لان ف مقابل الخروجات دى البنت بتتعرض لذل مستمر على ما يجي فرج ربنا وحد يفضي يخرج معاها مظنش ان غلطتنا ان الدنيا مبقاش فيها امان



بعد ذل استمر حوالى تلت اسابيع كانت اختى بتفرشي الملايه اذا فتحت الكمبيوتر او بصيت بعيد عن الكتاب او قمت من مكان خلال الامتحانات_على فكره دا كان بيحصل كتير_خلصت امتحاناتى امبارح وامبارح كان امتحان العار_التاريخ_هو عار من طرفين الطرف الاول انى اول واحده ف العيله ادخل ادبي والطرف التانى ان احداث التايخ نفسها تجيب العار الامتحان كان كويس جدا الحمد لله بس كان فيه سؤال متخلف تخلف على مستوى متدني السؤال الاول الاجباري رقم 4 ف الجزئيه أ ف الاختيار كان السؤال عباره عن كام يوم استمرت حرب اكتوبر (23_24_25_26) و واضح ف السؤال تجلى عبقرية المنهج و واضع الامتحان والطالب اللى رضي على نفسه يمتحن الامتحان السؤال مش من برا المنهج انا الفصل الخير مكنتش خلصته ف قعدت الصبح خلصته قبل الامتحان و عدت عليا الجمله دى انا اع مكنتش فاكراه لان الفرق ف الاختيارات يعمل لبس جامد واخترت وغيرت الاجابه حوالى اربع مرات
بس الامتحان كان حلو باستثناء وانا خارجه من اللجنه سمعت بت بتقول اامتحان زفت الكيما كان اسهل منه الف مره قلت لنفسي على كده العيال ما امتحنوش كيميا

حاليا زمان نعمه وهدير صحاباتى اللى واخدين احياء واقفين قدام المدرسه مستنظرين العقاب الابدي اللى هو امتحان الاحياء

حقيقه حقيقيه ان العيال كان عندهم رعب كانهم مش هيمتحنوا حاجه غير الاحياء امبارح وانا راجعه من امتحان التاريخ لقيت نعمه واقفه ف البلكونه_لان بيتهم على طريق الذهاب والعوده من المدرسه_ندهتلى وقالتلى استني هنزلك وقعدت تتطمن على الامتحان صعب ولا سهل من كتاب المدرسه اقولها سهل بس انا مبصتش ف كتاب المدرسه عشان اعرف الاسئله منه ولا لاء قالتلى امتحان الاحياء لازم يجي من الكتاب قلتلها يعني هو بمزاج مين ما هو هيجيب اللى هو عايزه
فضلنا كلمه منى على كلمه منها وجه اتنين زمايلنا وقفوا معانا انا قلت للبت ايه امك وابوكي بيدعولك قالتلى اه قلتلها خلاص اطمنى ومتشغليش بالك بحاجه
انا التاريخ مكنتش حاسه اني حافظاه كويس وصيت ابويا وامى يدعولى وخرجت مزاجعى عال

قبل امتحان التاريخ يوم الاربع كان امتحان الكيما الحمد لله صحبتي هيه كانت كيميا مع انى لما شوفتها اخر مره يوم الخميس يوم امتحان الفرنساوى كان قبل الكيما باربع ايام و دا ظلم كبير كانت قلقانه لانها مكانتش مزاكره الكيميا كويس طول السنه بس الامتحان ابدت اعجابها بيه


اغلب الطلبه مش بيهتموا باللغه الاجنبيه التانيه سواء فرنساوي او المانى او ايا كان مع انى بحب الفرنساوي موت وناويه اخد كورسات فيه ف المستقبل القريب لكن ف اول السنه كنت ف الغالب انا وزمايلي بنسمع جماعه الوضع دا استم شويه كا نوع من الا مبالاه بس حسيت الموضوع مش لطيف ف بدءت احفظ نص نص واسمع لوحدي وانسي اللى حفظته
مدرس الفرنساوي بتاعى كان ليه اسلوب ميناسبش طلبه كتير كان بيدرسلنا لغه مش منهج ومكانش بيعتمد على الحفظ كتير هو اه نحفظ الكلمات والقواعد والشواذ لكن مكانش بيحب يحفظنا موضوعات ومواقف كتير و دا اسلوب محترم

خلونا ف امتحان الفرنساوي كان قبل الفرنساوي يومين الا ربع ماكنتش فتره كفايه اخدنا حصتين مراجعه وبلاش اتكلم عن الضياع اللى ضيعته مع هبه ونعمه ف اول حصه من الحصتين كنا بنتكلم ومش مركزين بس تانى حصه متعرفوش ايه اللى حصل للمجموعه كلها يمكن كنا استوعبنا ان الامتحان فى صبيحة اليوم التالى
رحتا لامتحان وانا مش راضيه عن مذاكرتى و دا الطبيعي لان كل ما كان فى وقت اكتر بيكون فى مجهود اكتر ونتايج اكتر
الاستاذ كان متوقع يجيلنا حاجه ف الامتحان متعلقه بكاس الامم الافريقيه ف الوقت اللى انا كنت متاكده انه مش هيجي عنه حاجه_والله هو احساس ليس الا_وفعلا مجاش عنه حاجه والامتحان كان حلو هالص

كان قبل الفرنساوي امتحان الجبر اللى الشعب المصري كله اعجب بيه الا انا اه والله العظيم انا راضيه عن التفاضل وحساب المثلثات اكتر من الجبر
كان قبل كلا من التفاضل والجبر تلت ايام الا ربع_الربع اللى كان بيروح ف الامتحان اللى قبل كلا منهم_راجعنا كويس جدا _مراجعة الرياضه المراجعه الوحيده اللى حسيت ان ليها فايده_امتحان التفاضل اللى الناس قالت انه وحش كان كل سؤال من الاربعه الاختياري الجزئيه ب فيه صعبه وصعوبتها انها مش مباشره طلاسم الى حد ما بس الحمد لله اظن نفسي حليت طلاسمه و راجعت النواتح مع صحابي على التيك اواى وكان مبشر جدا بعد امتحان التفاضل كان الانجليزي
انا طول عمرى مستوايا ف الانجليزي اعلى من مستوايا ف كل المواد الا السنه دى قصرت على مدار السنه فيه سواء ف حفظ الكلمات او مذاكرة القواعد واسوء شيء حفظ الرفايع_اللى هي المترادفات والحاجات ام حرف جر والتعبيرات اللى ف قلب الدروس الحاجات اللى مينفعش فيها الا انها تحفظ كما انزلت_ او على الاقل دا كان احساسي تجاه نفسي ومع كل مراجعه كنت بحس انى افضل بس الحاجت اللى ملمتهاش من اول مره مش بستريحلها
الامتحان كان حلو مع ان حيرنى فيه حاجه او اتنين ف الاختياري يوم امتحان الانجليزي جاتلى توصيله من اهل واحده صحبتي مع انى كنت بفضل امشي مع هبه ونعمه بس بعد الحاح والدة صحبتي دى وافقت وقعدت راجعت معاها شويه
اللى وصلنى بعدها بقي ان مدرس الانجليزي بتاعنا قال ان الشاطره تجيب 23 ف الامتحان دا تتخيلوا النص نص هيروحوا فين

نرجع لامتحان الجبر
انا طول السنه بستريح للتفاضل وحساب المثلثات اكتر من الجبر وكنت بضايق من صحابي لما يقولوا حاجه على حساب المثلثات_على فكره فى مسئله فا حساب المثلثات مستوعبتش اذا كان اتجاها لفوق ولا لتحت فا عملتلها حلين والحمد لله لان كان كلامه ف اتجاه والواقع بيحكم ان الرسم يكون ف اتجاه تانى_استاذي قالنا اننا منتوقعش امتحان الجبر يكون اسهل من التفاضل وعيشنا ف احباط تام

انا حليت السؤال الاول ولا الايس كريم_من حلاوته يعني_دخلت على التانى المساله أ نص نص بالنسبالى جيت على ب مستلطفناش بعض سيبتها وقلت اكمل الباقى السؤال التالت كان تحفه_تورته مش ايس كريم_والرابع كان كويس جه الخامس شبه التالت حليت أ و ب طلع نمطها قريب من ب بتاعة السؤال التانى وحقيقتا يعتبر محلتهاش لان المشكله كان ف شكل المعادله شكلها يختلف عن الشكل اللى كنا بنحل بيها انا اه كنت اعرف الشكل دا بس مهتمتش بيه طول السنه ابدا لانه مكانش اساسي
ف امتحان الجبر انا كنت عارفه توزيع الدرجات السؤال الاول الاجباري الجزئيتيتن كل واحده ب تلاته ونص وباقى الاسئله كل جزئيه ب تلاته وبس
قعدت احسب لنفسي انا من بعد السؤال التانى اتوترت من جوايا شويه ف فى مسئلتين مقدرتش اعرف طريقة حلهم من اول نظره قعدت احسب لنفسي هجيب 16 _امى هتتقهر_هجيب 19_اختى هتشردني_هجيب 21_يا شماتة العيله فيا_ والحمد لله اللى ضمناه لنفسي التلاته قهرت امى وتشريد اختي وشمماتة خلق الله فيا

اول حاجه امتحان العربى كنت خايفه من التعبير اكتر من اي حاجه انا مستوايا ف النحو كويس جدا جدا جدا طول عمرى اللى كنت قلقانه منه اختيار معانى الكلمات التعبير والمدرس بتاعنا ادانا نصايح مشيت عليها على اد ما قدرت وكان متوقعلنا حاجات تيجي الحمد لله جات بالنص
بس عندي غلطه ف النحو فى حاجه كانت مبنيه للمجهول وانا ساعتها جالى حول ف الفهم والتذوق النحوي ماخدتش بالى انها مبنيه للمجهول و دا اثر على اعرابي للكلمه اللى بعدها
وتاريخ الادب
كان نفسي يجيلي من العباسي لان دا اكتر شيء ثابت معايا
جالنا من مصر الاسلاميه و دى كانت مفاجاءه مش لطيفه
كان السؤال عن اتجاهات الادب ف مرحلة النضج والازدهار انا افتكرتهم عملت الرقه والطبع وبعد كده بصيت لكلمةالطبع بقرف وقلت لنفسي انا هالف ولا ايه هي الرقه والصنعه وخليت الطبع صنعه ويالها من صنعه مهببه بهباب الفرن_بقيت بقول كلام شيك اوى_ الحمد لله
ندخل ف امتحان التربيه الدينيه الحمد لله جاتلى فرصه اقرء المنهج على التيك اواى لانى كنت بزوغ ف حصص العربي كتير ومكنتش اعرف الاخ هيديلنا دين و لا عربي ف الحالتين الحصه كانت بتضيع على استخفاف التساخفين وتريقة المتتريقين
كان عدنا سورة الكهف حفظ اولها حافظاه الى حد ما وجالنا التسميع منها انا محفظتهاش كمنهج انا بقرئها ف الغالب كل جمعه ف معلقه ف دماغى
الامتحان كن بحسبه ساعه ونص طلع ساعتين
ويالها من معضله حلينا وقعدنا قرفانيين
بس كان عندنا مراقب لطيف تجاذبنا معاه اطراف الحديث دا خلى الوقت يعدي

يعتبر ما كانش فى غش ف لجنتي بلاش افضح اللجان التانيه ما عدا امتحان الفرنساوي اللى كان هيصه و الدقايق الاخيره ف امتحان الجبر وف امتحان التاريخ كان عندنا مراقب جامد شاف كام بنت بيتكلوما عملهم محضر غش_مع انى مش متاكده انه اتعمل فعلا _على الاقل جاب الورق وهدد بكده

انا حاسه انى قلت كلام كتير اوى بس بقالى كتير مش بتكلم _الحرمان وحش_فا استحملوا منى البوقين دول كمان

هو المفترض الاجازه تكون مرحله انتقاليه نجدد فها نشاطنا ونزود مهاراتنا وليست فرصه للنوم والاكل واللعب فقط ولا الاكتئاب_دا بالنسبالى_حاجات كتير ممكن نعملها ف الاجازه بجانب الخروج والسهر والسفر كل اجازه بحط خطط كتير ف الغالب مش بحقق منها و5%بس دا عشان الجو النشيط اللى حواليا بس الشهر دا ان شاء الله _ما اجازتى شهر ولا حد متخيل غير كده_هعمل عمايل وهسوي الاكل كمان

بس انا سعيده بالاجازه دى ان شاء الله ف اولها اهو مشروع سفر لدمياط_بعد فشل مشروع السفر للسعوديه_وناويه اجبر امى تعلمنى استعمل مكنة الخياطه وسواء بمزاجاها او صب عنها هطبخ وهروح المكتبه واحتمال الجيم وهرجع انام ف البلكونه اعد النجوم وهنضف القطط بتاعتى عشان ميبقاش عندها زريعه لطردهم من البيت

كل اجازه بيكون نفسي اشتغل بس الموضوع بيلاقى رفض واستخفاف كبير ف البيت على اعتبار اننا مش محتاجين
بس انا نفسي اشتغل عشان احس ببعض الاستقلال المادى مش امى تحاسبني على الربع جنيه وعشان احس انى مفيده ف المجتمع مش فرد مستهلك بس
وهعوض شهور البؤس اللى مريت بيها خلال الدراسه وهظبط نفسي وهكتب بوستات كتير اطلع فيها اللى جوايا لان شحنات الافكار كانت بتتوالى عليا ايام الامتحانات والمراجعه

_______
ملحوظه خطيره جدا

البت اللى فوق دى مش انا
انا احلى من كده كتير

استنوا بقي العار كمان اسبوعين

الثلاثاء، ٢٤ يونيو ٢٠٠٨

بعبع هي؟؟ام كابوس؟؟



الا هما بيعملوا فينا كده ليه؟؟هو احنا عملنا فيهم حاجه ؟؟

السؤال اللى بيفرض نفسه ردا على سؤالى هو ..هما مين دول؟؟

اقولكم هما مين الحكومه واهلنا

الحكومه شايفين منها كتير واهلنا بنشوف منهم اكتر

بس احنا لسا مفتحين عنينا ع الدنيا بيعملوا فينا كده ليه؟؟

الا هو ليه من العار بين افراد الشعب المصري ان الواحد يبقي متخرج من معهد او من ثانوي تجارى ولا زراعى ولا فنى ولا صناعى

تعرفوا ان الواحد ممكن يدخل ثانوي صناعى ويضمن انه يدخل هندسه

هو كل البشر هيبقوا مهندسين ودكاتره وظباط

سمعت ادعاء اتمنى انه يكون باطل ان المصرين بيصرفواحوالى 50 مليار كل سنه عشان يطلعوا مئات الالاف من العوطليه

ما يوفروا الفلوس دي نجيب بيها ايس كريم

هو احنا بندخل الثانوي العام ونطحن نفسنا على امل نجيب مجموع يدخلنا احد كليات القمه ليه؟؟عشان نقعد على الرصيف بشهاده عليا

نفسي نعمل احصائيه على عدد الخريجين اللى بيشتغلوا ف نفس مجال دراستهم لان هيكون من الصعب حصر عدد الخريجين اللى بيشتغلوا بعيدا عن مجال دراستهم

حد يقولى استفاد ايه من دراسة من اول تمهيدي لحد ما اخد الشهاده العليا
بعد اذنكم انا استفدت بس مش كل الناس بتحب تعرف اى حاجه عن كل حاجه


لا يختلف اثنان على كون التعليم بتاعنا يجيب عته منغولى والمستوي العلمى والعقلي والتربوي للمدرسين ف الحضيض ناهيك عن المستوي الخلقى

دعونا نتجاهل البطاله وفشل منظومة التعليم وكون عدم وجود المدارس الحكوميه افضل بكتير من وجودها
ولنتجاهل فشل المسئوليين عن التعليم اللى ف يوم واحد منهم يصحي يقول نشيل ساته وبعد كام سنه يفوق من الغيبوبه ويرجع ساته
ولنتجاهل ايضا ان التفكير حاليا فى نظام الثانويه العامه كان واخد منعطفين متضادين تماما اما تبقي تلت سنين او سنه واحده
ولنتجاهل بشده تسرب الامتحانات ولنتجاهل معها الغش المبتكر الوسائل مختلف الالوان والاحجام والطبقات
____________________________________________
الجزء السابق دا كتبته على ما اتذكر بعد الامتحانات واظن قبل النتيجه بفتره تعد طويله
واسمحولى اكمل فضفضه
المصايب مرتبطه بالثانويه العامه من يوم ما ابتدعوها

كنت بسمع عن اللى انتحر واللى سافر بره مصر ياخد شهاده مكافئه ليها واللى عادها كام مره وكنت بستعجب وكنت بسمع عن الظلم اللى بيحصل فيها وبستعجب اكتر هو الموضوع يستاهل

وزال استعجابي واستغرابي لما عشت المأساه بنفسي

لما اشوف زميلات ف قمة التفوق مجابوش التسعين ومنهم مجابش حتي السبعين
يا تري دا حكم القدر ولا ظلم البشر ؟؟
لما اعرف ان زميله مقربه ليا حاولت تنتحر اخدت شريط حبوب وقعدت تخبط راسها ف الحيطه بس ما النتيجه جات مخيبه لاحلامها هو الموضوع يستاهل ؟؟ اكيد ميستاهلش
انا نفسي عيطت لما جات نتيجتي وقعدت اقول لنفسي هتعيطي عشان درجه يا عائشه دا انتى عمرك ما عملتيها بس ما منعتش نفسي

الامتحانات كانت صعبه لكننا زاكرنا وحلينا كويس

وحكومتنا الرشيده كل يوم بقرار وكل شويه بنظام هما هيفضل لحد امتى يدفعونا تمن فشلهم ولا احنا اللى فشله وبنطلع عقدنا على الخلق

التعليم ف مصر سيئ ॥قديمه، المدرسين معندهمش ضمير ॥ بتحصل ،المناهج عقيمه ॥ هذا هو المطلوب
بس فى ناس بتنجح وبتتفوق وبتوصل لدرجات علميه عاليه يا تري دى فلتات و لا دول مجتهدين
الا احنا فين ورايحين على فين ؟؟

الجمعة، ١٤ ديسمبر ٢٠٠٧

عم عبدو

مساء امس الخميس13-12-2007

و فى اخر الحصه الخامسه جات انطوانيت اللى هي مديرة المدرسه و مسكت الميكروفون وطلبت من كل افراد المدرسه يتجمعوا ف ارض الطابور

انا شياطين الدنيا لعبوا ف دماغى خصوصا انى كنت مزوغه من الحصه
قلت يمكن المزوغين كتير وحد اشتكالها من المدرسين وهتجيبنا تلغبطنا

بس ولله الحمد الموضوع طلع بعيد عن توقعاتى خااااااالص
لما افراد المدرسه اتجمعوا كلهم مسكت المايكروفون تانى و كانت مبتسمه ف اطمنت
وقالتنا انها جمعتنا دلوقتى عشان تكرم انسان مميز جدا
ساعتها الكل اتخنق بقي توقفنا تحرقنا ف الشمس عشان تكرم بني ادم يعين تمرمط بتاع 500 بني ادم اكراما لبني ادم واحد
قالتلنا مش هقولكم مين الشخص دا انا هتكلم عنه وانتوا تقولوا مين هعملكوا فزوره يعني
قلنا ميضرش اهي انطوانيت وغصب عننا هنتحملها
وكان كلامها كالاتى_هو شخص بيعمل ف المدرسه من بداية افتتاحها عام 1974 وطول فترة عمله ماخدش اجازه ولا غاب ولا عمل اي مشاكل ولا رفض ينفذ طلب يتطلب منه ولا اتعرض لاي عقاب من اى نوع

مفكرناش كتير توصلنا كلنا لانه عم عبدو(عبد الغني)؟
وكان فعلنا الشخص اللى جمعتنا عشان نكرمه عم عبدو

انا مؤمنه ان كل انسان فى ف حياته عم عبدو دا شئ لا جدال فيه وان حصل,ومكانش فيه فهي مجرد شواذ لا داعى لذكرهم
انا وعلى الرغم من تعبي الشديد وانى كنت بفكر اموت اول ما شوفت عم عبدو بملامحه المصريه الجميله وابتسامة الرضا اللى على وشه حسيت انى اتحسنت جدا
كان نفسي اقدر اصوره وهو واقف قدام العلم يحينا ولا الريس

قلت لنفسي ساعتها ان مدرسين كتير بيروحوا ويجوا ومحدش بياخد باله وممكن نسئل عنهم ومنلاقيش حدود كتير تعرف اخبارهم مع انهم اساتذه كبار اغلبهم طلعوا بعثات كملوا فيها دراستهم ف بلاد برا ومعاهم شهادات كبيره

تيجي انطوانت تكرم عامل النظافه؟؟حاجه كانت غريبه اوى عليا بس كانت مبهجه
اللى حصل بقي ان عم عبدو طلع على المعاش23_10
لكن لتمسك ادارة المدرسه بيه استصدروا قرار بانه يفضل ف المدرسه وكمان جابتله هديه

دا بيوافق نظريتي ان الناس لازم يكون مميز ايا كان مجال عمله دا عامل نظافه وفى ف المدرسه عمال كتير غيره
مفتكرش مره ان فى واحده ف المدرسه دعت على عم عبدو ولا واحده اتخنقت منه ولا شافته معدي غيرت طريقها عشان متشوفهوش بعكس مدرسين كتير بيحصل معاهم كده
وربنا يخلينا عم عبدو

السبت، ٤ أغسطس ٢٠٠٧

تحديد المصير

لما تلاقى نفسك داخل على 16 سنه وبقيت ف ثانيه ثانوى بقي لازم تحس انك بدءت رحلة تحديد المصير والرحله دي بتبتدي من اختيار الفرع اللى هتدرسه سواء ادبي او علمى رياضه او علوم

وانا ياخوانا فضلت من رابعه ابتدائي لحد ما خلصت تالته اعدادى احلم ادخل كلية الطب وابقي دكتورة امراض نفسيه وعصبيه تخصص قليل ف بلدنا و مفيد ومثير واختيارى دا كان نابع من ايمانى باهمية الصحه النفسيه
بس حصل حاجات كتير قبل ما اولى ثانوى تبدء خلتنى اغير خططى المستقبليه
وبعد ما كنت بقول لنفسي وللكل يا طب يا مش هدخل جامعه حاليا بقول بس لنفسي يا اعلام يا تصميم ديكور ف جميع الاحوال كنت ناويه اخلص الجامعه واخد كورسات تصميم ديكور

الادبي شئ مرتبط بالفشل ف مجتمعنا المصري وانا لما قررت ادخل ادبي امى انصدمت وقالتلى دا محدش ف العيله عملها حتى احمد ابن عمك مكانش شاطرو دخل علمى
احمد ابن عمى دا ياخونا جاب حاجه و80 و دخل حقوق بس دخلها من علمى
اختى بقي ياخوانا جابت ف تانيه 95 وجابت ف تالته 93 وبردوا شوية فكه ودخلت اداب
بس دخلتها من علمى ولا داعى لذكر ان اختى لما بتشوف ابن الجيران اللى دخل اداب زيه زيها من ادبي بحاجه وسبعين عشان بتتجنب انه يشوفها عشان بتتكسف لما تفتكر الوضع اللى هما اتساوا فيه
انا وبشهادة المدرسين بتوعى لازم ادخل علمى من الاعدادى والكل بيقولى يا دكتور انا كنت متفوقه ف العلوم ف الاعدادى لدرجة انى اتقهرت على نص الدرجه اللى نقصتها ف تالته اعدادى ف العلوم وانا مش من طبعي اتقهر على الدرجات
انا قررت ادخل اعلام وادرس تقديم واخراج لانى اكتشفت ان الاعلام اللى بيقولوا عليه السلطه الرابعه وانا شايفه انه السلطه الاولى ف التاثير على المجتمعات هو انسب وسيلة لاستغلال قدراتى ومواهبي و تشغيل كل طاقتى
بس مين يحس بيا
اهلى رافضين سفري للقاهره انا تبع جامعة المنصوره والمنصوره مفيها كلية اعلام ولا السن ولا سياسة واقتصاد ومظنش ان فى حتى اثار
اهلى رافضين مجال الاعلام اكتر من رفضهم لسفري القاهره
وما زاد الطين بله نظام التنسيق الجفرافى يعني ياخوانا هيبقي ابويا و وزير التعليم العالى عليا
بس انا املى ف ربنا كبير اكبر من الحكومه كلها طبعا واكبر من ابويا بكتير
حاولوا يحسسونى انى ارتكبت جريمه ف حق نفسي و ف حق اهلى وصحابي وحق المجتمع وقبلهم وزارتى التربيه والتعليم والتعليم العالى قبل اى حد زي انا فيا عرق صعيدي و ركبت الطناش و صممت على قرارى
العمليه ابتدت من رفضي للتفكير المتخلف اللى ماشي ف بلدنا
تسئل البت اول ما تتعلم الكلام عايزه تبقي ايه لما تكبرى تقول دكتورة اطفال و الواد يقول عايز ابقي ظابط او مهندس
كأن العمليه قفلت على كدا
انا بكره فكرة كليات القمه اللى منظر وخلاص انا ممكن اضغط على نفسي وادخل طب وابقي دكتوره محترمه وعندى ضمير بس مش هعمل اللى متعملش يعني مش عبقي فلته ف الطب انا عايزه اعمل فرق
الواحد بيبقي عايز شهاده يشتغل بيها وحاليا الكل بيقول ان مفيش شغل
هو اه نسبة البطاله بين الشباب8مليون بس مظنش ان فى بينهم مليون واحد متميزين ف مجالات تخصصهم هما هيشغلوا واحد جايب جيد وقدامهم واحد جايب جيد جدا و مثقف وبيتكلم لغات وبيتعامل مع الكمبيوتر كويس
مفيش واحد هياخد وظيفه الا لما يكون مؤهل ليها وف الاخر هي عملية نصيب


انا بدءت دروس من يومين والمدرسيين قعدوا يحكولنا على العيال اللى مروا بالتجربه المريره دى قبلنا خصوصا ان المجاميع بترتفع مواكبة لارتفاع الاسعار
يعني اللى جاب السنه دي 97 مدخلش طب
مستر توفيق دا راجل محترم بتعجبنى دماغه اوى بنتفق غالبا فا افكارنا نصحنا نراجع تفكيرنا تانى ف اختيارتنا
وحكالنا على واد جاب 101%وقرر يدخل كلية حقوق طبعا اهله رفضوا بس هو اتمسك باختياره مع انه كان علمى علوم و مجموعه يدخله طب هارفرد
ومرات عمى كانت بتحكيلي بردوا على واد كان جايب مجموع طب و دخل صيدله
المهم الواحد يختار شئ يقدر فيه يفيد نفسه ويفيد مجتمعه مش مجرد شهاده تتعلق على جدار ف برواز شيك او وظيفه برستيجها حلو ويجي من وراها مرتب كويس الموضوع المفروض نتعامل معاها بطريقه اعمق من دى نعيش لبلدنا ومجتمعنا قبل ما نعيش لنفسنا
بس مين يحس
اوبرا وينفري اللى هي مثلي الاعلى ونادر لما سئلت حد عنها وطلع ميعرفهاش مع ان مش كل اللى يعرفوها بيحبوها انا واحده بتحبها لانى شايفاها انسانه مثاليه بالنسبه لمعايير مجتمعها واتمنى اكون افضل منها
بتمني ربنا يوفقنى وابقي كمان 6 سنين صوت الشعب