الأحد، ٢٩ يونيو ٢٠٠٨

هيه هيه اخدت اجازه هيه


الاجازه شيء ممتع؟؟اكيد الكل شايف ان كلامى صح
واكيد الكل دا بيتضمن الناس اللى بتخرج وبتهيص وتتبسط ف الاجازه من اولها لاخرها
وف الغالب الشباب هما اللى بيعملوا كده اما البنات فا اذا خرجوا مع صحابهم بتبقي مرات معدوده ف اوقات محسوبه وبيقعدوا يستنوا فرج ربنا بابا ياخدهم يخرجهم ينزلوا مع مامتهم او اختهم الكبيره يعملوا شوبينج ومظنش ان دا لطيف ابدا لان ف مقابل الخروجات دى البنت بتتعرض لذل مستمر على ما يجي فرج ربنا وحد يفضي يخرج معاها مظنش ان غلطتنا ان الدنيا مبقاش فيها امان



بعد ذل استمر حوالى تلت اسابيع كانت اختى بتفرشي الملايه اذا فتحت الكمبيوتر او بصيت بعيد عن الكتاب او قمت من مكان خلال الامتحانات_على فكره دا كان بيحصل كتير_خلصت امتحاناتى امبارح وامبارح كان امتحان العار_التاريخ_هو عار من طرفين الطرف الاول انى اول واحده ف العيله ادخل ادبي والطرف التانى ان احداث التايخ نفسها تجيب العار الامتحان كان كويس جدا الحمد لله بس كان فيه سؤال متخلف تخلف على مستوى متدني السؤال الاول الاجباري رقم 4 ف الجزئيه أ ف الاختيار كان السؤال عباره عن كام يوم استمرت حرب اكتوبر (23_24_25_26) و واضح ف السؤال تجلى عبقرية المنهج و واضع الامتحان والطالب اللى رضي على نفسه يمتحن الامتحان السؤال مش من برا المنهج انا الفصل الخير مكنتش خلصته ف قعدت الصبح خلصته قبل الامتحان و عدت عليا الجمله دى انا اع مكنتش فاكراه لان الفرق ف الاختيارات يعمل لبس جامد واخترت وغيرت الاجابه حوالى اربع مرات
بس الامتحان كان حلو باستثناء وانا خارجه من اللجنه سمعت بت بتقول اامتحان زفت الكيما كان اسهل منه الف مره قلت لنفسي على كده العيال ما امتحنوش كيميا

حاليا زمان نعمه وهدير صحاباتى اللى واخدين احياء واقفين قدام المدرسه مستنظرين العقاب الابدي اللى هو امتحان الاحياء

حقيقه حقيقيه ان العيال كان عندهم رعب كانهم مش هيمتحنوا حاجه غير الاحياء امبارح وانا راجعه من امتحان التاريخ لقيت نعمه واقفه ف البلكونه_لان بيتهم على طريق الذهاب والعوده من المدرسه_ندهتلى وقالتلى استني هنزلك وقعدت تتطمن على الامتحان صعب ولا سهل من كتاب المدرسه اقولها سهل بس انا مبصتش ف كتاب المدرسه عشان اعرف الاسئله منه ولا لاء قالتلى امتحان الاحياء لازم يجي من الكتاب قلتلها يعني هو بمزاج مين ما هو هيجيب اللى هو عايزه
فضلنا كلمه منى على كلمه منها وجه اتنين زمايلنا وقفوا معانا انا قلت للبت ايه امك وابوكي بيدعولك قالتلى اه قلتلها خلاص اطمنى ومتشغليش بالك بحاجه
انا التاريخ مكنتش حاسه اني حافظاه كويس وصيت ابويا وامى يدعولى وخرجت مزاجعى عال

قبل امتحان التاريخ يوم الاربع كان امتحان الكيما الحمد لله صحبتي هيه كانت كيميا مع انى لما شوفتها اخر مره يوم الخميس يوم امتحان الفرنساوى كان قبل الكيما باربع ايام و دا ظلم كبير كانت قلقانه لانها مكانتش مزاكره الكيميا كويس طول السنه بس الامتحان ابدت اعجابها بيه


اغلب الطلبه مش بيهتموا باللغه الاجنبيه التانيه سواء فرنساوي او المانى او ايا كان مع انى بحب الفرنساوي موت وناويه اخد كورسات فيه ف المستقبل القريب لكن ف اول السنه كنت ف الغالب انا وزمايلي بنسمع جماعه الوضع دا استم شويه كا نوع من الا مبالاه بس حسيت الموضوع مش لطيف ف بدءت احفظ نص نص واسمع لوحدي وانسي اللى حفظته
مدرس الفرنساوي بتاعى كان ليه اسلوب ميناسبش طلبه كتير كان بيدرسلنا لغه مش منهج ومكانش بيعتمد على الحفظ كتير هو اه نحفظ الكلمات والقواعد والشواذ لكن مكانش بيحب يحفظنا موضوعات ومواقف كتير و دا اسلوب محترم

خلونا ف امتحان الفرنساوي كان قبل الفرنساوي يومين الا ربع ماكنتش فتره كفايه اخدنا حصتين مراجعه وبلاش اتكلم عن الضياع اللى ضيعته مع هبه ونعمه ف اول حصه من الحصتين كنا بنتكلم ومش مركزين بس تانى حصه متعرفوش ايه اللى حصل للمجموعه كلها يمكن كنا استوعبنا ان الامتحان فى صبيحة اليوم التالى
رحتا لامتحان وانا مش راضيه عن مذاكرتى و دا الطبيعي لان كل ما كان فى وقت اكتر بيكون فى مجهود اكتر ونتايج اكتر
الاستاذ كان متوقع يجيلنا حاجه ف الامتحان متعلقه بكاس الامم الافريقيه ف الوقت اللى انا كنت متاكده انه مش هيجي عنه حاجه_والله هو احساس ليس الا_وفعلا مجاش عنه حاجه والامتحان كان حلو هالص

كان قبل الفرنساوي امتحان الجبر اللى الشعب المصري كله اعجب بيه الا انا اه والله العظيم انا راضيه عن التفاضل وحساب المثلثات اكتر من الجبر
كان قبل كلا من التفاضل والجبر تلت ايام الا ربع_الربع اللى كان بيروح ف الامتحان اللى قبل كلا منهم_راجعنا كويس جدا _مراجعة الرياضه المراجعه الوحيده اللى حسيت ان ليها فايده_امتحان التفاضل اللى الناس قالت انه وحش كان كل سؤال من الاربعه الاختياري الجزئيه ب فيه صعبه وصعوبتها انها مش مباشره طلاسم الى حد ما بس الحمد لله اظن نفسي حليت طلاسمه و راجعت النواتح مع صحابي على التيك اواى وكان مبشر جدا بعد امتحان التفاضل كان الانجليزي
انا طول عمرى مستوايا ف الانجليزي اعلى من مستوايا ف كل المواد الا السنه دى قصرت على مدار السنه فيه سواء ف حفظ الكلمات او مذاكرة القواعد واسوء شيء حفظ الرفايع_اللى هي المترادفات والحاجات ام حرف جر والتعبيرات اللى ف قلب الدروس الحاجات اللى مينفعش فيها الا انها تحفظ كما انزلت_ او على الاقل دا كان احساسي تجاه نفسي ومع كل مراجعه كنت بحس انى افضل بس الحاجت اللى ملمتهاش من اول مره مش بستريحلها
الامتحان كان حلو مع ان حيرنى فيه حاجه او اتنين ف الاختياري يوم امتحان الانجليزي جاتلى توصيله من اهل واحده صحبتي مع انى كنت بفضل امشي مع هبه ونعمه بس بعد الحاح والدة صحبتي دى وافقت وقعدت راجعت معاها شويه
اللى وصلنى بعدها بقي ان مدرس الانجليزي بتاعنا قال ان الشاطره تجيب 23 ف الامتحان دا تتخيلوا النص نص هيروحوا فين

نرجع لامتحان الجبر
انا طول السنه بستريح للتفاضل وحساب المثلثات اكتر من الجبر وكنت بضايق من صحابي لما يقولوا حاجه على حساب المثلثات_على فكره فى مسئله فا حساب المثلثات مستوعبتش اذا كان اتجاها لفوق ولا لتحت فا عملتلها حلين والحمد لله لان كان كلامه ف اتجاه والواقع بيحكم ان الرسم يكون ف اتجاه تانى_استاذي قالنا اننا منتوقعش امتحان الجبر يكون اسهل من التفاضل وعيشنا ف احباط تام

انا حليت السؤال الاول ولا الايس كريم_من حلاوته يعني_دخلت على التانى المساله أ نص نص بالنسبالى جيت على ب مستلطفناش بعض سيبتها وقلت اكمل الباقى السؤال التالت كان تحفه_تورته مش ايس كريم_والرابع كان كويس جه الخامس شبه التالت حليت أ و ب طلع نمطها قريب من ب بتاعة السؤال التانى وحقيقتا يعتبر محلتهاش لان المشكله كان ف شكل المعادله شكلها يختلف عن الشكل اللى كنا بنحل بيها انا اه كنت اعرف الشكل دا بس مهتمتش بيه طول السنه ابدا لانه مكانش اساسي
ف امتحان الجبر انا كنت عارفه توزيع الدرجات السؤال الاول الاجباري الجزئيتيتن كل واحده ب تلاته ونص وباقى الاسئله كل جزئيه ب تلاته وبس
قعدت احسب لنفسي انا من بعد السؤال التانى اتوترت من جوايا شويه ف فى مسئلتين مقدرتش اعرف طريقة حلهم من اول نظره قعدت احسب لنفسي هجيب 16 _امى هتتقهر_هجيب 19_اختى هتشردني_هجيب 21_يا شماتة العيله فيا_ والحمد لله اللى ضمناه لنفسي التلاته قهرت امى وتشريد اختي وشمماتة خلق الله فيا

اول حاجه امتحان العربى كنت خايفه من التعبير اكتر من اي حاجه انا مستوايا ف النحو كويس جدا جدا جدا طول عمرى اللى كنت قلقانه منه اختيار معانى الكلمات التعبير والمدرس بتاعنا ادانا نصايح مشيت عليها على اد ما قدرت وكان متوقعلنا حاجات تيجي الحمد لله جات بالنص
بس عندي غلطه ف النحو فى حاجه كانت مبنيه للمجهول وانا ساعتها جالى حول ف الفهم والتذوق النحوي ماخدتش بالى انها مبنيه للمجهول و دا اثر على اعرابي للكلمه اللى بعدها
وتاريخ الادب
كان نفسي يجيلي من العباسي لان دا اكتر شيء ثابت معايا
جالنا من مصر الاسلاميه و دى كانت مفاجاءه مش لطيفه
كان السؤال عن اتجاهات الادب ف مرحلة النضج والازدهار انا افتكرتهم عملت الرقه والطبع وبعد كده بصيت لكلمةالطبع بقرف وقلت لنفسي انا هالف ولا ايه هي الرقه والصنعه وخليت الطبع صنعه ويالها من صنعه مهببه بهباب الفرن_بقيت بقول كلام شيك اوى_ الحمد لله
ندخل ف امتحان التربيه الدينيه الحمد لله جاتلى فرصه اقرء المنهج على التيك اواى لانى كنت بزوغ ف حصص العربي كتير ومكنتش اعرف الاخ هيديلنا دين و لا عربي ف الحالتين الحصه كانت بتضيع على استخفاف التساخفين وتريقة المتتريقين
كان عدنا سورة الكهف حفظ اولها حافظاه الى حد ما وجالنا التسميع منها انا محفظتهاش كمنهج انا بقرئها ف الغالب كل جمعه ف معلقه ف دماغى
الامتحان كن بحسبه ساعه ونص طلع ساعتين
ويالها من معضله حلينا وقعدنا قرفانيين
بس كان عندنا مراقب لطيف تجاذبنا معاه اطراف الحديث دا خلى الوقت يعدي

يعتبر ما كانش فى غش ف لجنتي بلاش افضح اللجان التانيه ما عدا امتحان الفرنساوي اللى كان هيصه و الدقايق الاخيره ف امتحان الجبر وف امتحان التاريخ كان عندنا مراقب جامد شاف كام بنت بيتكلوما عملهم محضر غش_مع انى مش متاكده انه اتعمل فعلا _على الاقل جاب الورق وهدد بكده

انا حاسه انى قلت كلام كتير اوى بس بقالى كتير مش بتكلم _الحرمان وحش_فا استحملوا منى البوقين دول كمان

هو المفترض الاجازه تكون مرحله انتقاليه نجدد فها نشاطنا ونزود مهاراتنا وليست فرصه للنوم والاكل واللعب فقط ولا الاكتئاب_دا بالنسبالى_حاجات كتير ممكن نعملها ف الاجازه بجانب الخروج والسهر والسفر كل اجازه بحط خطط كتير ف الغالب مش بحقق منها و5%بس دا عشان الجو النشيط اللى حواليا بس الشهر دا ان شاء الله _ما اجازتى شهر ولا حد متخيل غير كده_هعمل عمايل وهسوي الاكل كمان

بس انا سعيده بالاجازه دى ان شاء الله ف اولها اهو مشروع سفر لدمياط_بعد فشل مشروع السفر للسعوديه_وناويه اجبر امى تعلمنى استعمل مكنة الخياطه وسواء بمزاجاها او صب عنها هطبخ وهروح المكتبه واحتمال الجيم وهرجع انام ف البلكونه اعد النجوم وهنضف القطط بتاعتى عشان ميبقاش عندها زريعه لطردهم من البيت

كل اجازه بيكون نفسي اشتغل بس الموضوع بيلاقى رفض واستخفاف كبير ف البيت على اعتبار اننا مش محتاجين
بس انا نفسي اشتغل عشان احس ببعض الاستقلال المادى مش امى تحاسبني على الربع جنيه وعشان احس انى مفيده ف المجتمع مش فرد مستهلك بس
وهعوض شهور البؤس اللى مريت بيها خلال الدراسه وهظبط نفسي وهكتب بوستات كتير اطلع فيها اللى جوايا لان شحنات الافكار كانت بتتوالى عليا ايام الامتحانات والمراجعه

_______
ملحوظه خطيره جدا

البت اللى فوق دى مش انا
انا احلى من كده كتير

استنوا بقي العار كمان اسبوعين

هناك ١٠ تعليقات:

Ruwida Ashour يقول...

the most important thing is u finished exams prison finally............good luck

موناليزا يقول...

بالنجاح ان شاء الله
عايزينك تفرحينا بمجموع كبير
اجازة سعيدة عليكى حبيبتى

Unknown يقول...

عارفة
انت شقية جداا
وواضح عليكى انك مجننة الكل
وانا منهم طبعاا

بالتوفيق والنجاح يارب
ويارب يكون مجموع يفرح القلب

برافوا عليك ياقمر بوستك حلو

NilE_QueeN يقول...

weda

i whish u the best in your life

موناليزا
محتاجه انجح بمجموع كبير وبالتالى محتاجه كل دعوه وكل ما حد يدعي الامل هيكبر وهو كمان هياخد ثواب

نهر الحب

على فكره انا حمل وديع
الا بقي ف معظم الاحيان كلمة شقاوه دي قليله

موناليزا يقول...

ربنا ينجحك وبمجموع كبير ويفرحنا جميعا بنجاحك

Moustafa` يقول...

ان شاء الله بعد أسبوع واحد
هنسمع زغاريط كتير
ربنا يكرمك يارب
----
انا كان ليا نت عمتي فتانيه السنه دي
يخربيت جمال التغطيه دي
روعه لأ وايه نطلع من قدام لورا ونرجع تاني لقدام
يعنى أركوباتات ف الهوا
قصدي ترتيب المواد يعني
---
انتي فالتعبير وحش !! اذبهلال عجيب
---
فين البوستات الكتير ....
حلوه الخطط بتاع الأجازه
ربنا معاكي
سلاام

د. إيمان مكاوي يقول...

والله بدعيلك من قلبي
ربنا معاك ومع كل إللي في الثانويه العاميه
حبيبتي
ياريت تصلحي كلمة واللهي إلى الله في العنوان لأنه لا يجوز كتابة لفظ الجلاله كده ..ولك حبي وتحياتي يا قمر

NilE_QueeN يقول...

موناليزا

بيني وبينك ان اللى يهمني ف نجاحى انى اسعد امى وابويا واجبر بخاطرهم هما وكل اللى يسعدهم نجاحى

اما عنى فالموضوع تحول لقضاء واجب

________________

sagi

انا مش عايزه حد يزغرط
انا عايزه هداياااا

اه مش بعرف اكتب تعبير من بتاعهم لانى مش بكتب حاجه الا لما احسها واحب اخد وقتي مش مواضيعهم العقيمه _احلى حاجه الواحد يرمي فشله على غيره_هما المفروض يجيبوا مواضيع حلوه

____________

ايما(ام البنين)

هصلحها حاضر

Moustafa` يقول...

النتيجه ظهرت
اخدت جوله ف التالت مدونات مافيش اخبار
---
طمنينا عملتي ايه ؟؟
يارب فوق ف السما
بجد منتظر أخبار
تحياتي كتير
وربنا يارب يوفقك اوي .. ويحققلك كل أحلامك
ومبرووووووووووووووك كبيره

موناليزا يقول...

اذيك ياجميلة
عملتى ايه؟
طبعا نقول الف مبروك
طمنينا عليكى