السبت، ٤ أغسطس ٢٠٠٧

تحديد المصير

لما تلاقى نفسك داخل على 16 سنه وبقيت ف ثانيه ثانوى بقي لازم تحس انك بدءت رحلة تحديد المصير والرحله دي بتبتدي من اختيار الفرع اللى هتدرسه سواء ادبي او علمى رياضه او علوم

وانا ياخوانا فضلت من رابعه ابتدائي لحد ما خلصت تالته اعدادى احلم ادخل كلية الطب وابقي دكتورة امراض نفسيه وعصبيه تخصص قليل ف بلدنا و مفيد ومثير واختيارى دا كان نابع من ايمانى باهمية الصحه النفسيه
بس حصل حاجات كتير قبل ما اولى ثانوى تبدء خلتنى اغير خططى المستقبليه
وبعد ما كنت بقول لنفسي وللكل يا طب يا مش هدخل جامعه حاليا بقول بس لنفسي يا اعلام يا تصميم ديكور ف جميع الاحوال كنت ناويه اخلص الجامعه واخد كورسات تصميم ديكور

الادبي شئ مرتبط بالفشل ف مجتمعنا المصري وانا لما قررت ادخل ادبي امى انصدمت وقالتلى دا محدش ف العيله عملها حتى احمد ابن عمك مكانش شاطرو دخل علمى
احمد ابن عمى دا ياخونا جاب حاجه و80 و دخل حقوق بس دخلها من علمى
اختى بقي ياخوانا جابت ف تانيه 95 وجابت ف تالته 93 وبردوا شوية فكه ودخلت اداب
بس دخلتها من علمى ولا داعى لذكر ان اختى لما بتشوف ابن الجيران اللى دخل اداب زيه زيها من ادبي بحاجه وسبعين عشان بتتجنب انه يشوفها عشان بتتكسف لما تفتكر الوضع اللى هما اتساوا فيه
انا وبشهادة المدرسين بتوعى لازم ادخل علمى من الاعدادى والكل بيقولى يا دكتور انا كنت متفوقه ف العلوم ف الاعدادى لدرجة انى اتقهرت على نص الدرجه اللى نقصتها ف تالته اعدادى ف العلوم وانا مش من طبعي اتقهر على الدرجات
انا قررت ادخل اعلام وادرس تقديم واخراج لانى اكتشفت ان الاعلام اللى بيقولوا عليه السلطه الرابعه وانا شايفه انه السلطه الاولى ف التاثير على المجتمعات هو انسب وسيلة لاستغلال قدراتى ومواهبي و تشغيل كل طاقتى
بس مين يحس بيا
اهلى رافضين سفري للقاهره انا تبع جامعة المنصوره والمنصوره مفيها كلية اعلام ولا السن ولا سياسة واقتصاد ومظنش ان فى حتى اثار
اهلى رافضين مجال الاعلام اكتر من رفضهم لسفري القاهره
وما زاد الطين بله نظام التنسيق الجفرافى يعني ياخوانا هيبقي ابويا و وزير التعليم العالى عليا
بس انا املى ف ربنا كبير اكبر من الحكومه كلها طبعا واكبر من ابويا بكتير
حاولوا يحسسونى انى ارتكبت جريمه ف حق نفسي و ف حق اهلى وصحابي وحق المجتمع وقبلهم وزارتى التربيه والتعليم والتعليم العالى قبل اى حد زي انا فيا عرق صعيدي و ركبت الطناش و صممت على قرارى
العمليه ابتدت من رفضي للتفكير المتخلف اللى ماشي ف بلدنا
تسئل البت اول ما تتعلم الكلام عايزه تبقي ايه لما تكبرى تقول دكتورة اطفال و الواد يقول عايز ابقي ظابط او مهندس
كأن العمليه قفلت على كدا
انا بكره فكرة كليات القمه اللى منظر وخلاص انا ممكن اضغط على نفسي وادخل طب وابقي دكتوره محترمه وعندى ضمير بس مش هعمل اللى متعملش يعني مش عبقي فلته ف الطب انا عايزه اعمل فرق
الواحد بيبقي عايز شهاده يشتغل بيها وحاليا الكل بيقول ان مفيش شغل
هو اه نسبة البطاله بين الشباب8مليون بس مظنش ان فى بينهم مليون واحد متميزين ف مجالات تخصصهم هما هيشغلوا واحد جايب جيد وقدامهم واحد جايب جيد جدا و مثقف وبيتكلم لغات وبيتعامل مع الكمبيوتر كويس
مفيش واحد هياخد وظيفه الا لما يكون مؤهل ليها وف الاخر هي عملية نصيب


انا بدءت دروس من يومين والمدرسيين قعدوا يحكولنا على العيال اللى مروا بالتجربه المريره دى قبلنا خصوصا ان المجاميع بترتفع مواكبة لارتفاع الاسعار
يعني اللى جاب السنه دي 97 مدخلش طب
مستر توفيق دا راجل محترم بتعجبنى دماغه اوى بنتفق غالبا فا افكارنا نصحنا نراجع تفكيرنا تانى ف اختيارتنا
وحكالنا على واد جاب 101%وقرر يدخل كلية حقوق طبعا اهله رفضوا بس هو اتمسك باختياره مع انه كان علمى علوم و مجموعه يدخله طب هارفرد
ومرات عمى كانت بتحكيلي بردوا على واد كان جايب مجموع طب و دخل صيدله
المهم الواحد يختار شئ يقدر فيه يفيد نفسه ويفيد مجتمعه مش مجرد شهاده تتعلق على جدار ف برواز شيك او وظيفه برستيجها حلو ويجي من وراها مرتب كويس الموضوع المفروض نتعامل معاها بطريقه اعمق من دى نعيش لبلدنا ومجتمعنا قبل ما نعيش لنفسنا
بس مين يحس
اوبرا وينفري اللى هي مثلي الاعلى ونادر لما سئلت حد عنها وطلع ميعرفهاش مع ان مش كل اللى يعرفوها بيحبوها انا واحده بتحبها لانى شايفاها انسانه مثاليه بالنسبه لمعايير مجتمعها واتمنى اكون افضل منها
بتمني ربنا يوفقنى وابقي كمان 6 سنين صوت الشعب

هناك ١٢ تعليقًا:

أنا حر يقول...

والله حرام يكون تحديد المصير من خلال سنتين وامتحانات زي بتاعت الثانوية العامة دي اللي بيمتحنونا في مناهج ملهاش اي علاقة باللي احنا بنحلم بيه
حاولي تصممي على تحقيق حلمك متعة كبيرة قوي اننا نحقق احلامنا
مدونة جميلة وموضوع لذيذ تحياتي ليكي وبالتوفيق

krystyna يقول...

Hi Nile_QueeN!
I'm so glad to meet very young, smart girl. Sorry, I don't understand your language even I tried to translate. I know only little bit what you are writing.
I wish you all the best in your life and let your dreams come true!

مؤمنه يقول...

السلام عليكم ورحمة الله وبركاته
ربنا يوفقك يارب وتحققى كل أهدافك
بس انت كده هتنافسينا ع العموم ما يجراش حاجه
لينا الشرف
سلام يا قمر
ودومتى بكل خير
والسلام عليكم ورحمة الله وبركاته

agreenearth يقول...

Hi from Australia

NilE_QueeN يقول...

krystyna

you mad me glad with your visit and comment

اختى مؤمنه
انا لا يمكن انافس اساتذتى

green earth

you are welcom

Mahmoud يقول...

جميل اوى انك تفكرى فى مستقبلك بالطريقة اللى تحبيها وتتخيلى نفسك فى مجال بتحبيه
بس هأقولك كلمة بصراحة
احنا فى مصر
أهم حاجة ان الشخص يختار مجال بيجيب فلوس ومطلوب
ولو خلاص بقى بيجيب فلوس بعد كده يعمل اللى هو عايزه
والمشكلة انك حتى لو دخلتى الكلية اللى انتى بتحبيها ممكن أوى تتصدمى بواقع التعليم المصرى
بالمناسبة انا فى أخر سنة كلية الحاسبات فى المنصورة
وكنت داخلها برغبتى التامة
لكن للأسف الشديد التعليم فى مصر يكره الواحد فى كل حاجة
انا مش عايز اعقدك بس اللى اقصده انك تفكرى بشكل واقعى ومش عيب تستفيدى من الناس اللى سبقوكى
وبالمناسبة
لو مصممة على اعلام عندك كلية الأداب أفتكر فيها قسم اعلام وفى تربية برده
ودول فى جامعة المنصورة يعنى مش محتاجة سفر
وكل سنة وانتى طيبة

NilE_QueeN يقول...

كل سنه وانت طيب يا محمود

متقلقش خالص واقول اللى ف نفسك انا مصابه بكل العقد الموجوده على الارض

وبخصوص اقتراحك انى ادخل اداب قسم اعلام
فا مظنش ان الدراسه الاعلام كا شعبه ف اداب هيكون نفس دراسة الاعلام ف كلية مخصصه ليه

غير ان انا عايزه ابعد شويه واحاول استقل بحياتى

مصطفي النجار يقول...

كلية اعلام مش زي ما انتي متخيلة
العمل الاعلامي مفتوح الان للجميع والكلية مش شرط
المهم الموهبة لا المهم الواسطة
دا شيء ، والشيء الاخر ان استقلالك بحياتك
دي فكرة عايزة اعادة نظر عشان الموضوع دا صعب جدا الان

NilE_QueeN يقول...

alnagar

انا بحب يبقي كل شيء كما ينبغي ان يكون عشان كده عايزه ادرس اعلام واشتغل ف الاعلام

الواسطه بقت من متطلبات الحياه ف مصر
بس انا وسطتى ربنا

mido_6000 يقول...

انا قول مره اخش البلوج ده
بجد حلو اوى
و ياريت تحققى حلمك
اصل انا لسه خارج من ثانويه عامه و مدخلتش الانا عاوزه للاسف"فنون جميله" مع انى كنت جايب 91
و دخلت تجاره انجليش
بس نصيحه لو لا قدر الله مدخلتيش اعلام شوفى كليه تجيبلك فلوس فى المستقبل

و ربنا يوفئك و نشوفك زى اوبرا كده





باى

dina يقول...

ولا يهمك...انا علمى رياضة اه انما بردو اهلى مش موافقيين..و فعلا فى نظرية استخسار للمجاميع ..اللى يجيب مجموع عالى يبقى لازم يدخل اعلى كلية ممكن يجيبها حتى لو مش بيحبها و انا مقتنعة جدا بكلامك ان فعلا فعلا المتميز دايما له شغله و مجاله....خليكى زى ما انتى يا بنوتة انتى كدا صح

NilE_QueeN يقول...

dina

الواضح اننا مجتمع شكليات ودا بيعوق تقدمنا
ربنا يوفقك ويوفق كل مجتهد وانتى سايبه المذاكره وبتفتحي نت ليه مينفعش كده